सुरळीच्या वड्या

मिठाईच्या दुकानात गेले कि हमखास लक्ष्य वेधून घेणारा पदार्थ म्हणजे सुरळीच्या वड्या. फक्त सुग्रण हातांनाच जमत असावा अशी शंका येणारा त्याचा पातळ पदर मोहात पाडतो. दुसरेच काहीतरी घ्यायला गेलेलो आपण नकळत सुरळीच्या वड्यांचीही ऑर्डर देऊन मोकळे होतो. पण आजपासून असे होणार नाही. त्याच वाघिणीच्या दुधाची म्हणजेच सुरळीच्या वड्यांची पाककृती आज शिकणार आहोत.

सुरळीच्या वड्या-

साहित्य-
१ कप बेसन [डाळीचे पीठ]
१ कप पाणी
१ कप ताक
१ चमचा मीठ
१ चमचा हळद
१ चमचा मैदा

सारण-
२ वाट्या कोथिंबीर
१  नारळ [खवलेले]

फोडणीसाठी-
२ छोटे चमचे मोहोरी
२ मोठे चमचे तेल

कृती-
बेसन [डाळीचे पीठ], पाणी , ताक [१-१ कप], मीठ, हळद, मैदा [१-१ चमचा] हे सर्व साहित्य एकत्र करून मिश्रण तयार करून घेणे. मिश्रणात गाठ होता काम नये. हे मिश्रण एकजीव करून ५ मिनिटे चांगले शिजवून घेणे. शिजवताना मिश्रण सतत हलवत राहणे म्हणजे गाठ तयार होणार नाही. २ मिनिटे झाकण ठेऊन मंद आचेवर वाफ येऊ देणे. पांढरी वाफ निघाली कि मिश्रण खाली उतरवणे.
ताटाला मागच्या बाजूला तेलाचा हात लावून घेणे, त्यावर हे मिश्रण गरम असतानाच बोटाने पटपट पसरवणे. बोटाने जमत नसेल, चटका बसत असेल तर सपाट वाटीच्या मागच्या बाजूला पाणी लावून त्याने पसरवणे. मोहोरीची फोडणी तयार करून घेणे. ताटावर पातळ पसरवलेल्या सरणावर कोथिंबीर आणि नारळ पसरवून त्यावर फोडणी घालणे. सुरीने लांब लांब पट्ट्या कापून त्या गोल गुंडाळणे. झाली चटपटीत सुरळीची वाडी तय्यार. खजूर आणि चिंचेच्या गोड चटणी बरोबर किंवा हिरव्या चटणीबरोबर खायला देणे. 

१ वाटी बेसनात ४ ते ५ ताटांना सारण पसरवून लावता येते. 

- सौ पुष्पा हेरंब आवटी (माझी आई)